गुगलवर शोधा हरवलेली पेजेस

आपण आपल्या मेंदूंचा १० टक्केच भाग वापरतो , उरलेला ९० टक्के भाग आपण कधी वापरतच नाही. कॅम्प्युटरचंही अस्सचं आहे. रोज कम्प्युटर वापरणारेही , कोणीतरी शिकवलेल्या पद्धतीने कामं करत राहतात. पण या सायबरजगात अनेक आयडिया आहेत , ज्या नेहमीचं कॅम्प्युटिंग सोप्पं करु शकतील. अशा भन्नाट आणि इण्ट्रेस्टिंग आयडिया सांगणारा ' जस्ट यंग ' चा नवीन कॉलम

तुम्ही गुगलवर काहीतरी अर्जं....ट शोधताय आणि ' पेज नॉट फाउण्ड ' अशी एरर आली , तर काय कराल ? खरं तर अशा वेळी फक्त डोक्यात वीज जायचीच बाकी असते. पण ' आपल्या ' ( इण्टरनेटवर प्रेम करणारा कोणीही गुगलला ' परकं ' कसं मानू शकेल) गुगलनेच यावर उत्तर शोधून ठेवलंय.

जेव्हा अशी एरर येते तेव्हा बऱ्याचदा असं होतं की , त्या साइटने ते पेज इण्टरनेटवरून काढून टाकलेलं असतं. हे पेज इण्टरनेटच्या जगातच उरलं नसेल तर गुगल तरी कुठून शोधणार ? पण , यातून मार्ग काढण्यासाठी एक स्पेश्शल रस्ता आहे. ते पेज काढून टाकण्याआधी गुगलने ते आपल्यासाठी सेव्ह केलेलं असतं. याला म्हणतात , ' गुगल कॅश. '

ही ' गुगल कॅश ' फॅसिलिटी वापरण्याची पद्धतही अगदी सोपी आहे. गुगलवर एखादा सर्च मारल्यावर प्रत्येक सर्चच्या पुढे 'Cached' असा ऑप्शन दिसतो. त्यावर क्लिक केल्यावर गुगलने कॅशमध्ये सेव्ह केलेलं पेज सहज उपलब्ध होऊ शकतं.